新資本主義（三）-- 潮人自傳

前言

新資本主義裡一個主要影響社會及經濟發展的因素，就是社會結構裡位於中及基層的「棟樑」。

「棟樑」的特質是，他不知道自已是「棟樑」。如前文所述，社會會不斷創造身分去美化「棟樑」，令人沾沾自喜。現實世界裡，社會上層不斷創造文化給「棟樑」發掘及追隨，令他們迷幻於自我滿足。

以下是從我光怪陸離的生活裡其中一個例子。此段訪問於零四年九月進行。

訪問

各位好，我係「潮人」，我既生活態度係用一個字形容，就係「潮」！

何謂「潮」？我既生活、品味、舉止、言談就係「潮」。唔明，速睇！

我有 iPod 。你唔好以為我唔知乜野係 MP 衫 （MP3）！MP 衫咪即係老翻囉！不過我好少用，因為 iPod 冇收音機，聽唔到新 X 財 X 台嘛，而且我都唔知邊度有得 downgrade（download）MP 衫。（咁你有 CD 卦？）CD ？ CD 咁大隻點放入 iPod 呀？

講開新 X 財 X 台，我由起身聽到訓覺架。佢地 d 主持好堅架！買乜（股票）升乜！（咁你賺唔少啦）唉，都唔知點解，到我入市時就跌。我每逢有業績公佈就通宵研究，又留意公司背景及發展。喂，我睇過你既著作「新資本主義」，話股票升跌同公司業績無關，有冇搞錯， d 主持賺到錢就證明你錯啦。（但你賺唔到喎，不過我見你買升，我即刻買跌，我都賺喎）

我四圍試最新美食，我介紹你既一定係好野。第一，我唔去茶餐廳，因為會肚痾。第二，街邊野唔食。第三，我唔食牛肉、羊肉、鴨、鵝。（咁豬及雞呢？）一般唔食，因為豬肉肥，雞就最愛，不過唔食雞皮。（海鮮呢？）凈係食石斑，因為價錢貴，我唔食平魚架，有（多）骨都唔食。（咁你鍾意食邊種石斑？）我唔識分架。（蝦、蟹呢？）要剝殼，唔食。（蠔、蜆、螺呢？）呢 d 肚痾架，同埋我唔食生野。（魚生呢？）我淨係食三文魚。（但魚生係生架喎。）你有冇搞錯呀，日本野好乾淨架。（係嘛，日本好「潮」，所以好乾淨。）

仲有，蔬菜我唔食，因為菜冇味道。飯食得多會肥，所以唔食。（你都幾肥喎。）我得少少肚腩乍（38 腰都話少少？）男人要大隻 d 先 man 同「潮」架。（不過你甩頭髮）我尖車乍（ skin hair）響 EspiXt 剪，成二舊幾水架。

（咁你最鍾意食乜？）麥 X 奴同黐擊（cheese cake）點解？麥 X 奴廣告多，夠 in 。 d 潮流雜誌成日介紹黐擊，所以要喪撐！

仲有乜野要喪撐？潮服羅。我淨係著 A&X ，夠「潮」呀。波鞋我就喪撐 NiXe ，凡一 X 便利話會熱賣就即 check 啦。（漏夜排隊買？）唔會，你估我係 MK 仔咩（常於旺角出現的少年）我地呢「潮」界梗係上 eBay B （bid）啦！（咁有冇 Paypal ）乜野黎架？ eBay B 野要用 Paypal 俾錢咩？（但我曾經見你排隊買波鞋喎。）邊會呀？可能你見我響銀行門口排隊抽新股乍。（我明明見到你響尖沙咀 NiXe 專門店漏夜排隊）冇，一定冇！

（咁講下你仲有乜野係引以為「潮」）「潮」界必撐我一定有。我有 iPod 、仲有部韓國 MP 衫用黎聽收音機。 PDA 用黎記電話。（淨係用黎記電話？上網都得架喎）上網我用電腦架。（你咁「潮」，梗係用 Mac 機） Mac 機用黎做 graphic ，又唔可以做「某 d 咩 d 淫」（multimedia - 「潮」人最後都不能成功讀出此字），人地話 Mac 機上唔到網同睇唔到中文架。（但 Mac 機先夠「潮」喎）車，所以我部 P4 downgrade 左 Mac 機 wallpaper。

潮流

「潮人」所追逐的「潮」，在六十年代被稱為「時興」。七至八十年代被稱為「潮流」。九十年代被稱為「流行文化」。進入千禧後，簡稱為「潮」。

市面上每日湧現形形色色的資訊（雜誌、評論、廣告等等）去披露所謂最新最 update 潮中物。說真， 「潮」是社會上層製造和複製（「復古」）的產品。「楝樑」從緊貼潮流獲得認同和成功感 –– 十分困難地從實質工作和人際關係獲得的東西。

為了令「楝樑」更方便去了解和緊貼潮流（也可以寫成「為了令「楝樑」更方便去麻醉於潮流」），潮流絕不可以抽象化和流於表現主義。六十年代象徵美國主流意識形態的 pop art 可被視為潮流的變異。 pop art 把潮流的商業味一下子提升至 high arts（註：歐洲社會視美國 pop art 為 low arts），結果 pop arts 成為美國當代藝術，走進美術館裡，但與庶民脫鉤 –– 了解和緊貼潮流必須毫無技術可言，否則「楝樑」會感到吃力和挫敗。

實際的遊戲規則是潮流必需是可被預測、通俗和付費。

潮流必須配合商品推出。「楝樑」為了緊貼潮流，他們必需長期依賴潮流資訊。

資訊要通俗，例如「潮人」必備的 iPod ，它與其他的 mp3 （請勿讀作 mp 衫）播放機同樣擁有 mp3 播放功能。「潮人」只知道 iPod 「潮」，只要 iPod 夠「潮」，我又夠錢買，不需知道音樂是甚麼，更加不需知道怎樣從電腦入歌。

潮流不是文化。如前段所述，「潮人」必須依賴潮流資訊，就像道友要毒品一樣，所以不應該免費。另一方面，免費取得的潮流資訊對「潮人」來得太容易，他們沒有「艱苦」地發掘過，沒有成功感，潮流變得沒有意義。

民主社會往往奉行資本主義，因為選票的力量不及潮流的麻醉力。「楝樑」忙著緊貼潮流，沒有空去理會社會上層的所作所為。（續：新資本之民主與共產）

二零零五年三月二十三日

這不是「潮人」，是為另一商業網站繪畫之宣傳海報。