幾星期前於旺角地鐵站乘電梯從大堂往地面。同「車立」有一名老坑、一名自由行模樣的師奶，和「潮人」一名。「潮人」斜戴trucker hat，穿人猿 t-shirt （很多潮人不懂去分辨人猿、猩猩、馬騮和狒狒）；褲，是低腰 bucky 板仔褲，另加一條鐵鍊由褲頭繞過褲檔駁入褲袋；鞋，走不出其他配搭，又是板仔鞋。臉上留點鬚根，目光迷惘但反叛，本來好型，但似唔夠瞓多 d 。
這一身打扮，完全係潮人 icon look ，係潮人制服。（潮人不是要有獨特又突出的個性嗎？怎會有制服這回事？潮流雜誌不是經常用潮人必 check 、必買、必備嗎？既然逢「潮」必買，何來獨特又突出？）
「潮人」戴住 Apple iPod 原裝耳筒 -- 應該係 iPod 用家 -- 雖然我見過有人光天化日下攞部韓國河流（...sweeter one）出品嘅 mp3 （正音：mp three，潮音 mp 衫）充大頭鬼。
老坑、師奶和我走進電梯，而「潮人」就隨住音樂節奏 un下 un 下咁 un 入電梯，好型。
自由行師奶應說：「好火！」
老坑應該用佢嘅年代嘅潮語：「好 XX （音：能漆）！」
電梯徐徐上升。「潮人」為了貫徹反叛禿廢形象，面朝梯門，繼續 un un un 。
電梯抵達地面，門打門 -- 不過是另一端的門。
老坑、師奶和我走出電梯，而潮人就隨住音樂節奏、對住電梯門繼續 un un un ，冇出「車立」，真係好型、好火、好 XX （音：能漆）！
「iPod 潮人」乃業務上往來人士，自誇用 iPod 先夠潮。早前儲夠米買了 iPod nano。前日他無意中看見我那部第二代 iPod ，大嚷：「呢部乜嘢嚟？」
「iPod 囉，同你部一樣，不過係第二代。」我說。
「我未見過喎。」
「梗係啦，出咗好多年。當時出果陣（2003），香港都冇乜邊幾個人知乜嘢係 iPod 。」
之後，講吓講吓，又講到 PDA 電話，佢又一輪咀嗡出甚麼 iPhone 、 Windows Mobile，貌似甚了解，但再講吓講吓，他未聽過 Palm 和 Windows CE。
之後，他又問 Mac 好不好用，因為他想買 -- 因為用 Mac 機好潮：「響沙畢（Starbuck）見人攞住部 Mac 機上網，好型。」
「咁你去豐澤睇睇啦，佢哋有二十四個月分期。咁你想買邊部？」我說。
「iMac 嘛，蘋果唔係出 Mac 機咩？」
「你諗住攞部 iMac 去 Starbuck （潮音：沙畢）上網？」
「梗係啦，iMac 可以上 Wi-Fi 嘛？不過我個 friend 話 iMac 淨係可以無線上網，Wi-Fi 唔知唔得？我個 friend 又話 iMac 冇 IE ，咁咪即係上唔到網，所以我好唔明。」
我立刻回答「下次先傾」，匆匆離開。我期望他早日攞住 iMac （最好係 24 吋）去 Starbuck（潮音：沙畢） 上 Wi-Fi ，一定好型、好火、好 XX （音：能漆）！
